نور جہاں کابھارت پہنچنے پر کیسا استقبال ہوا؟ دھرمیندر نے انکے قدموں میں گر کر کیا کہا؟ بیٹی نے بتادیا

ملکہ ترنم نور جہاں کی بیٹی حنا درانی نے والدہ کے ساتھ بھارت پہنچنے پر ان کے شایان شان کیے گئے استقبال سے متعلق چند انکشافات کیے ہیں۔

پاکستان فلم اور میوزک انڈسٹری کی لیجنڈری اداکارہ و گلوکارہ نور جہاں کی صاحبزادی حنا درانی حال ہی میں جیو نیوز کے پوڈکاسٹ میں شریک ہوئیں جس دوران انھوں نے والدہ کی زندگی کی خوبصورت یادوں کو مداحوں سے شیئر کیا۔

حنا درانی نے بتایا کہ ’امی 35 سال بعد لیجنڈری اداکار دلیپ کمار اور یش چوپڑاکی دعوت پر 3 ہفتوں کیلئے بھارت گئی تھیں، اس وقت میں بھی والدہ کے ہمراہ تھی، میری عمر 17 سال تھی اور والد نے میرے جہیز کی شاپنگ کی غرض سے مجھے والدہ کے ہمراہ بھارت بھیجا تھا جہاں پہنچ کر مجھے والدہ کی اہمیت اور مقام کا صحیح اندازہ ہوا'۔

نورجہاں کی صاحبزادی کے مطابق ’بھارت روانگی سے قبل ہمیں این او سی نہ ملنے کے باعث پاکستان کے ائیر پورٹ پر روک دیا گیا لیکن والدہ بضد تھیں کیوں کہ انھیں بھارت میں ہونے والے شو میں لازمی شرکت کرنی تھی اسی بحث کے دوران طیارہ رن وے پر آگیا لیکن پھر ہمیں اچانک این او سی ملا اور پھر اسی طیارے کا رخ موڑ کر ہمیں بھارت کیلئے روانہ کیا گیا, یہ میرے لیے زندگی کا پہلا موقع تھا جب میں نے کسی طیارے کو روک کر مسافروں کو پرواز کرواتے دیکھا ‘۔انھوں نے بتایا کہ بھارت لینڈ کرنے پر والدہ کے جہاز سے اتر نے اور ہوٹل پہنچنے تک پھولوں سے استقبال کیا گیا، ہوٹل پہنچنے پر تقریباً تمام بھارتی اسٹارز کی جانب سے والدہ کے استقبال کیلئے پھول بھیجے گئے، ہزاروں لوگوں کے مجمع نے والدہ کا پھولوں سے استقبال کیا، بھارت میں گزاری پہلی رات کا ڈنر ہم نے دلیپ کمار کے گھر کیا، وہاں ریکھا ، دھرمیندر ، راج کپور ، ششی کپور، جاوید اختر اور شبانہ اعظمی سمیت بالی وڈ کے کئی ستاروں نے شرکت کی‘۔

حنا درانی نے مزید بتایا کہ ’اس ملاقات میں دھرمیندر کا جذباتی ردعمل آج بھی مجھے یاد ہے، دھرمیندر والدہ کو دیکھ کر ان کے قدموں میں لیٹ گئے تھے، انھوں نے والدہ کے آگے ہاتھ جوڑ کر کہا تھا کہ میں آپ کا سب سے بڑا فین ہوں، اس وقت امی بھی گھبراگئی تھیں کیونکہ امی نے کبھی پاکستان میں ایسا نہیں دیکھا تھا‘۔